في السنوات الأخيرة استطاع الفنان اللبناني طوني عمون ان يحقق النجاح عبر الميديا بشكل كبير في أسلوب خاص به لا يشبه الآخرين على صعيد الغناء واكمل مسيرته رغم التنمر والمحاربة موقع اضواء استضافه في هذا اللقاء وكان هذا الحوار :
١- احكينا عن بداية مسيرتك الفنية وكيف اكتشفت موهبتك
اكتشفت موهبتي من الصغر كنت حب غني و انا و عم غني كنت حب اسمع صوتي عام ٢٠١٤ فتحت فايسبوك و تعرفت عالفنانة مجدلا نجمة مهرجانات بعلبك و بيت الدين و ربطتني صداقة فيها و مرة قالتلي سمعني صوتك طوني غنيتلها سألوني الناس للست فيروز ، قالتلي طوني ما فكرت تغني ولا مرة ؟ عندك كتير إحساس و هالإحساس بيميزك لازم تغني ، بعد فترة اتصلت فيي و قالتلي عارضين عليها مهرجانات بيت الدين و ضمن المهرجان بدها تقدم موهبة من اختيارها ، قالتلي رح تكون طوني انت هالموهبة و طلبت مني سجل تلات اغنيات ستوديو حتى تقدمهن للجنة مهرجانات بيت الدين ، اتصلت بالصديق الفنان جورج مارتينوس و سمعته صوتي و سجلت عنده الأغاني و سلمتهن للفنانة مجدلا و حبيت كتير تجربة تسجيل الأغاني صرت سجل و نزل عالسوشيال ميديا و صار الجمهور يتعرف علي
٢- اكتر اغاني قديمة تميزت فيها
غنيت لكبار المطربين و أعدت تسجيل روائع المكتبة الموسيقية اللبنانية و العربية و الفرنسية، غنيت لكتار و لكن اكتر شي الناس بيحبو غني للست فيروز مع إحترامي الكبير لكل فنان او فنانة غنيتلهن
٣- مين اكتر فنانين اثروا فيك
أكتر فنانين اثروا فيي السيدتين
صباح و فيروز و تعلمت منهن كتير قصص ، تعلمت من الصبوحة الفرح و اتخطى الحزن و حب كل زملائي الفنانين و اتمنالهن الخير و اذا حدا اذاني مارد الأذية و تعلمت منها بالفن كيف يكون عندي نفس طويل لما غني تمرنت عمواويلها و تعلمت من الست فيروز الصمت و يكون كلامي قليل و ما أحكي إلا الكلمة اللازمة و فنيا تعلمت من الست فيروز الإداء انا ما دخلت كونسرفاتوار انا استاذتي الست فيروز
٤- كيف تتعامل مع التنمر بالحياة والمسخرة عالميديا
التنمر ما بيأثر فيي ولا بيعنيلي بالحياة و عالسوشيال ميديا لأن ما بلتفت للسلبية بلتفت للإيجابية و ما بهتم للتعليقات الجارحة بنسيها بعمل بلوك للمتنمر و بفرح بالتعليقات الإيجابية ، ما بيهمني الناس اللي ما بيحبوني بيهمني الناس اللي بيحبوني
٥- شو هي الرسالة لي حابب تقدمها من فنك
الرسالة اللي حابب قدمها من فني لو صوتي ناعم و مختلف حبيت يوصل للناس حتى قلهن الإختلاف غنى و ربنا ما بيخلق شي مش حلو بدليل منحني صوت مختلف و لكن جميل بكل تواضع بشهادة كبار الفنانين و محبة الناس الكبيرة لصوتي
٦- شو هي أمنياتك على الصعيد اللبناني والفني والشخصي
أمنياتي على الصعيد اللبناني يرجع السلام و الازدهار لوطننا الحبيب و يكون منارة لكل العالم
على الصعيد الفني بتمنى أقدر واصل مسيرتي الفنية و اتوفق بشركة انتاج و مدير اعمال يوقفو حدي وعلى الصعيد الشخصي بطلب الصحة و الستر
٧- لمين حابب تجدد اغاني بالمستقبل
كل أغنية جميلة و ناجحة و ذات مستوى عالي بحب جددها
٨- خبرنا عن جديدك بعالم الفن
جديدي أغنية خاصة اسمها ” يمكن ” كلمات ألحان توزيع و تسجيل ستديو الفنان جورج مارتينوس و أغاني لفنانين كبار أعدت تسجيلها بصوتي .
حاوره رئيس تحرير موقع اضواء سامي مبارك
